03‏/08‏/2016

كلام حلم


 إللي اتنَقَل من اللي فات

دا مااتنقلشي بالسكات 
---

الوِشّ صِحي م النوم قلقان

عينيه منفوخَة قارية الظروف
دَقّ و ضَرَب في القلْب خوف
نَفَس سيجارة  وَجَع في الجُوف

نَفَسُه عارِف  مش مقطوع
   ونَبْضُه رغم القلق مسموع
مظبوطَة ساعته ممدود إيقاعُه
زي السواقي  و زيّ  المدّ 
زيّ السحاب تشيله الريح
حكايات كتير مالهاش عدد




الخَطْو في المُدُن ممدود
قلّ السمر لكن لُه ساعة
  تكرار جوّة الزمن موجود
تفاصيله بتقوّي المناعة

و اللي اتنَقَل من اللي فات
دا مااتنقلش بالسكات 
---

زاد الهُموم و قلّ الجَهْل
زاد الوَجَع قلّت شكواي
قلّ التباهي باللي راح

زاد القلق على اللي جاي


و اللي اتنَقَل من اللي فات
دا مااتنقلش بالسكات 
---

 نام الشباب يِحْلَم بعرْكة
بلا غُنا و بلا ابتسامهم 
يصحوا زامِم خالص جبينهم 
يزيد بياض في سواد شعورهم
و لو الإجابة مش في الأصول
إيه اللي ممكن يجاوبهم؟
و بيتغيّر شكل الفصول
ولا المطر و لا الربيع في مواعيدهُم 
وإيه ممكن نشاهدُه نقول:
"هنا حقيقة...تساعدهم"


و اللي اتنَقَل من اللي فات
دا مااتنقلش بالسكات 
---

و لو المباني شبه اللي ساكنها 
و تبان جميلة
ليه اللي ساكن مش بشوش
و مالُهش حيلة
مابقاش خَجَل من القِوالَة
و بتنتشر زيّ النيران
و لا تنطفيش
حتى و لو بان مالهاش أثر
حييجي وقت  مايكونش عركة
 ما بتنتهيش

نعمِل وَطَن جُوّة الوطن
فيه الخيال هو القانون
 و لو ظهر الكلام حالِم 
أو بان مجنون
خلّينا ننام نحلَم في ليل 
نحلم نهار
نِفَوِّت الأزمة علينا
و لمّا نِصحَى تكون صفحِتنا
ماهيش حزينة
مافيهاش هموم كل اللي فات
و قلق المدينة

سلام يسري
تونس - فبراير ٢٠١٦
  

ليست هناك تعليقات: